Naxçıvan Dövlət Texniki Kollecində Vətən müharibəsi şəhidi baş leytenant Fuad Əlizadənin anım tədbiri keçirilib
Naxçıvan Dövlət Texniki Kollecində Vətən müharibəsi şəhidi baş leytenant Fuad Əlizadənin anım tədbiri keçirilib
2020-ci il sentyabrın 27-də başlanan Vətən müharibəsində Azərbaycan Respublikasının Prezidenti, Müzəffər Ali Baş Komandan cənab İlham Əliyevin siyasi iradəsi, uzaqgörənliyi və qətiyyəti sayəsində rəşadətli ordumuz cəmi 44 gün ərzində düşməni döyüş meydanında məğlub etdi. Bununla da torpaqlarımız erməni işğalından azad edildi. Azərbaycan hərb meydanında 30 illik vətən həsrətinə son qoymaqla, qazandığı şanlı qələbə ilə ilahi ədaləti həyata keçirdi, beynəlxalq hüququ bərpa etdi.
Rəşadətli ordumuzun şücaəti, igid oğullarımızın qəhrəmanlığı sayəsində bu gün doğma Qarabağımızın hər yerində üçrəngli müqəddəs bayrağımız dalğalanır. Neçə-neçə vətən oğulları öz canları, qanları bahasına Azərbaycanın yeni, şanlı zəfər salnaməsini yazdılar.
Belə oğullardan biri də, vətənin ərazi bütövlüyünün qorunması üçün şəhidlik zirvəsinə ucalan, Azərbaycan Respublikası Prezidentinin müvafiq sərəncamları “Döyüşdə fərqlənməyə görə”, “Vətən uğrunda”, Cəbrayılın, Laçının, Qubadlının azad olunmasına görə medalları, şəhadətindən əvvəl isə “Azərbaycan Ordusunun yaranmasının 100 illiyi” medalı ilə təltif olunan Əlizadə Fuad Nazim oğludur.
İyulun 5-də Naxçıvan Dövlət Texniki Kollecində şəhid qəhrəmanımızın anım tədbiri keçirilib. Tədbirdə şəhidin ailə üzvləri, Naxçıvan şəhər İcra Hakimiyyətinin şöbə müdiri İsmayıl Gülməmmədov, Naxçıvan Dövlət Texniki Kollecinin müəllim və tələbə kollektivi, şəhər ictimaiyyətinin nümayəndələri iştirak edib.
Tədbir iştirakçıları əvvəlcə şəhidimizin məzarını ziyarət edib, önünə gül dəstələri düzərək xatirəsini ehtiramla yad ediblər.
Daha sonra anım tədbiri Naxçıvan Dövlət Texniki Kollecində davam etdirilib. Burada dövlət himni oxunub, Ümummilli Lider Heydər Əliyevin və vətənimizin azadlığı uğrunda şəhidlik zirvəsində ucalmış qəhrəmanlarımızın əziz xatirəsi bir dəqiqəlik sükutla yad edilib.
Tədbirdə çıxış edən Naxçıvan Dövlət Texniki Kollecinin direktoru Asəf Ruşanov şəhidin ailəsinə başsağlığı verərək nümunəvi, vətənpərvər, mərd, şücaətli oğul böyütdükləri üçün şəhidin valideynlərinə minnətdarlığını bildirib.