Tədris
Naxçıvan Dövlət Universitetinin nəzdində Naxçıvan Dövlət Texniki Kollecində tədris
Azərbaycan Respublikası Elm və Təhsil Nazirliyinin tabeliyində fəaliyyət göstərən Naxçıvan Dövlət Texniki Kolleci orta ixtisas təhsili müəssisəsi kimi ixtisaslı mütəxəssislərinin hazırlığını həyata keçirən təhsil müəssisəsidir.
Kollecdə tədris ili bir qayda olaraq sentyabrın 15-də başlayır və ixtisasın tədris planına uyğun olaraq 5 iyul tarixində başa çatır. İxtisasların təhsil müddəti 3 ildir. Naxçıvan Dövlət Texniki Kollecində dərslərin aşağıdakı əsas növləri müəyyənləşdirilmişdir:
- Mühazirə
- Seminar
- Təcrübi məşğələ
- Laboratoriya
- Tədris təcrübəsi
- İstehsalat təcrübəsi:
Naxçıvan Dövlət Texniki Kollecində tədris Azərbaycan Respublikası Təhsil Nazirliyinin əmri ilə təsdiq edilmiş “Subbakalavr hazırlığı üzrə orta ixtisas təhsilinin dövlət standartının təhsil proqramı”na uyğun olaraq həyata keçirilir. Məzunlara orta ixtisas haqqında subbakalavr ixtisas dərəcəsini təsdiq edən diplom verilir. 2014-cü ildən Naxçıvan Dövlət Texniki Kollecində tədrisdə kredit sistemi tətbiq edilir. Tələbələrin biliyinin kredit sistemi ilə qiymətləndirilməsi Azərbaycan Respublikası Nazirlər Kabinetinin 26 dekabr 2013 tarixli 354 saylı qərarına uyğun aparılır. Bu sistem tələbələrin tədris dövründə əldə etdikləri biliklərin qiymətləndirilməsinin mövcud sistemini təkmilləşdirmək və onun səmərəliyini artırmaq məqsədi daşıyır. Digər tərəfdən isə bu sistem tələbəyə fərdi yanaşmanı təmin etməklə onun tədris prosesindəki fəaliyyətini əsas istiqamətini əhatə etməyə imkan verir.
Naxçıvan Dövlət Texniki Kollecinin məzunlarına orta ixtisas təhsili haqqında verilən dövlət sənədi bu stanadart üzrə peşə hazırlığı səviyyəsində və peşə fəaliyyəti dairəsində işləmək və təhsilini dəvam etdirmək imkanı verir. Orta ixtisas təhsilinin peşə təhsili proqramında aşağıdakı fənlər nəzərdə tutulur:
- ÜF – B00 – Ümumtəhsil fənləri
- HF – B00 – Humanitar fənlər
- İPF – B00 – İxtisasın peşə hazırlığı fənləri
Naxçıvan Dövlət Texniki Kollecinin tədris proqramı tədris işləri üzrə direktor müavinin tədris ilinə aid iş planına əsasən aparılır. Təhsil alanın – tələbənin həftəlik dərs yükü 1.5 kreditdir. Hər dərs 90 dəqiqə olmaqla iki akademik saat aparılır. Bir akademik saat 45 dəqiqədir. Sillabuslar kollecin mütəxəssisləri tərəfindən tərtib edilir. Fənlər üzrə tədris proqramlarında hazırki stanadartların tələbləri fənnə uyğun elmi sistemli kursunu əhatə edir. Təhsilin yüksək səviyyədə keçirilməsi üçün yeni proqramlar kollecin müəllimləri tərəfindən tərtib olunur. Orta ixtisas təhsilinin istiqamətləri və ixtisası üzrə məzunların biliyinə və hazırlıq səviyyəsinə verilən ümumi tələblər hər bir istiqamət və ixtisas üzrə dövlət standartı ilə müəyyən edilir.
Naxçıvan Dövlət Texniki Kolleci direktorunun əmri ilə təhsilə başlayan şəxs tələbə adlanır. Naxçıvan Dövlət Texniki Kollecinin tələbəsi elmin, texnikanın, mədəniyyətin müasir səviyyəsinə uyğun bilik əldə etmək, hər növ tədris məşğələlərində iştirak etmək, kitabxana, kabinə, laboratoriya, kompüter otaqlarından istifadə etmək hüququna malikdir. Tələbəyə tələbə kartı və təqaüd kartı kimi smart kart verilir.
Naxçıvan Dövlət Texniki Kollecinin tələbələri təhsilin tələblərini yerinə yetirməyə borcludurlar. Onlar kollecin Nizamnamə tələblərini yerinə yetirməli və daxili nizam-intizam qaydalarına riayət etməlidirlər.
Naxçıvan Dövlət Texniki Kollecində tələbələrin digər müəssisələrə köçürülməsi, təhsilalma formasının dəyişməsi, xaric edilməsi, bərpa olunması və akademik məzuniyyətin verilməsi Azərbaycan Respublikası Təhsil Nazirliyinin “Orta ixtisas təhsili müəssisələrində tələbələrin köçürülməsi, təhsilalma formasını dəyişməsi, xaric edilməsi, bərpa olunması və akademik məzuniyyət verilməsinə dair müvəqqəti Qaydalar”a uyğun olaraq həyata keçirilir.