Haqqımızda

Naxçıvan Dövlət Universitetinin nəzdində Naxçıvan Dövlət Texniki Kolleci haqqında

Naxçıvan Dövlət Texniki Kolleci orta ixtisas təhsili müəssisəsi kimi 25 fevral 1925-ci ildə Naxçıvan Muxtar Respublikasının IV Sovetlər qurultayında “Naxçıvan Kənd Təsərrüfatı Texnikumunun yaradılması haqqında” qərarın qəbul edilməsindən sonra yaradılmışdır. Həmin qərara əsasən 1925-1926-cı tədris ilində Naxçıvan Kənd Təsərrüfatı Texnikumu kənd təsərrüfatının mexanikləşdirilməsi və aqronomluq ixtisasları üzrə 41 nəfər tələbə ilə fəaliyyətə başlamışdır. Kollec 1971-ci ilin sentyabr ayınadək Naxçıvan Kənd Təsərrüfatı Texnikumu kimi fəaliyyətini davam etdirərək müxtəlif ixtisaslar üzrə kadr hazırlığı ilə məşğul olmuşdur. 1971-ci ildə Babək rayonunun Şıxmahmud kəndinə köçürülərək burada toxumçuluq sovxozu ilə birləşdirilmiş və M.Hüseynzadə adına “Naxçıvan Sovxoz Texnikumu” adını almışdır. Həmin zamanlar texnikuma Azərbaycanın digər rayonlarından və qonşu respublikalardan soydaşlarımız da təhsil almaq üçün gəlirdilər. Həmin vaxtdan 1990-1991-ci tədris ilinədək texnikum Babək rayonunun Şıxmahmud kəndində fəaliyyət göstərmişdir. Aqrar islahatın başlanması və ictimai təsərrüfatın ləğv olunması ilə əlaqədar olaraq texnikum 1991-ci ilin sentyabr ayında Naxçıvan şəhərində yerləşən tələbə yataqxanasına köçürülmüş və Naxçıvan Kənd Təsərrüfatı Texnikumu adını almışdır. 03 may 1997-ci ildən 11 sentyabr 1999-cu ilədək Naxçıvan Aqrar Sənaye Kolleci adı altında fəaliyyət göstərmiş və 15 sentyabr 1999-cu il tarixdən 25 oktyabr 2002-ci ilədək yenidən Naxçıvan Kənd Təsərrüfatı Texnikumu adı altında fəaliyyətini davam etdirmişdir. Naxçıvan Kənd Təsərrüfatı Texnikumu 26 avqust 2002-ci ildən Azərbaycan Respublikası Nazirlər Kabinetinin 140 saylı qərarı ilə Naxçıvan Dövlət Texniki Kolleci adını almış və 25 oktyabr 2002-ci il tarixdən bu günədək bu ad altında fəaliyyətini davam etdirir. Azərbaycan Respublikası Prezidentinin “Azərbaycan Respublikasında təhsil sisteminin təkmilləşdirilməsi haqqında” 13 iyun 2000-ci il tarixli fərmanı ilə bir sıra dövlət qurumlarının tabeliyində olan orta ixtisas təhsili müəssisələrinin Azərbaycan Respublikası Təhsil Nazirliyinin tabeliyinə verilməsi ilə orta ixtisas təhsilinin məzmununda köklü dəyişikliklərin aparılmasına, kadr hazırlığı strukturunun və təhsil müəssisələri şəbəkəsinin təkmilləşdirilməsinə imkan yaratmışdır. Həmin fərmanın qəbul edilməsinədək kollec Azərbaycan Respublikası Kənd Təsərrüfatı Nazirliyinin tabeliyində olmuşdur. Fərmanın qəbul edilməsindən sonra isə kollec Azərbaycan Respublikasının Kənd Təsərrüfatı Nazirliyinin tabeliyindən çıxarılıb Azərbaycan Respublikası Təhsil Nazirliyinin tabeliyinə verilmişdir. 30 aprel 2012-ci ilədək Azərbaycan Respublikası Təhsil Nazirliyinin tabeliyində olmuş kollec həmin vaxtdan Azərbaycan Respublikası Nazirlər Kabinetinin qərarı ilə Naxçıvan Muxtar Respublikası Təhsil Nazirliyinin tabeliyinə verilmişdir. Eyni zamanda, ölkədə təhsil komplekslərinin yaradılması sahəsində 2000-ci ildən başlayaraq müəyyən işlər görülür. 2008-ci ildən orta ixtisas təhsili müəssisələrində eksperiment formasında tələbələrin biliyinin qiymətləndirilməsində çoxballı sistemin tətbiqinə başlanılıb. Bu məqsədlə «Tələbələrin biliyinin qiymətləndirilməsinin çoxballı sistemi haqqında müvəqqəti əsasnamə» hazırlanıb və Təhsil Nazirliyinin 20 fevral 2008-ci il tarixli, 231 №-li əmri ilə təsdiq edilib. Orta ixtisas təhsili fasiləsiz təhsil sisteminin tərkib hissəsi olmaqla bir-biri ilə bağlı iki məsələni – gənclərin müxtəlif peşələrə yiyələnməsini və onların ümumi icbari təhsil almalarını təmin edir. Naxçıvan Dövlət Texniki Kolleci də muxtar respublikanın təhsil sisteminin tərkib hissəsi kimi səmərəli fəaliyyətlə məşğul olmaqla orta ixtisaslı kadrlar hazırlayır. Ötən illər ərzində kollecin normativ-hüquqi bazası demək olar ki, tam formalaşdırılıb. Orta ixtisas təhsili sahəsində aparılan dövlət siyasəti onun məzmunca dəyişilməsinə, mövcud sosial-iqtisadi şəraitə uyğun mütəxəssis hazırlığı strukturunun təkmilləşdirilməsinə imkan verib. Kollecin məzunları sırasında Azərbaycanın tanınmış elm xadimləri: Akademiklərdən – Həsən Əliyev, Həsən Abdullayev, professorlardan – Yunis Səfərov, Hacı Hacıyev, Paşa Zamanov, Sovet İttifaqı Qəhrəmanlarından – Qəzənfər Əkbərov, Sosialist Əməyi qəhrəmanlarından – Məmməd Əsgərov, Narı Quliyeva olmuşlar. 1995-ci ildə kollec bağlanma təhlükəsi qarşısında qalmışdır. Çünki, həmin vaxt kollec kənd təsərrüfatı texnikumu kimi fəaliyyət göstərirdi. İctimai təsərrüfatın ləğv olunması ilə əlaqədar olaraq kənd təsərrüfatı ixtisaslarına marağın azalması müşahidə olunmuş, onun təsiri kollecdən də yan kecməmişdir. Lakin, muxtar respublika rəhbərliyi keçid dövrünün bu çatışmazlığını aradan qaldırmaq və orta ixtisas təhsili məktəblərinə marağı artırmaq üçün kollecdə bir necə texniki ixtisasın açılmasına göstəriş vermişdir. Məhz, Naxçıvan Muxtar Respublikası Ali Məclisinin Sədrinin böyük səyləri nəticəsində kollec bağlanma təhlükəsindən kənarda qalmış və texniki ixtisasların açılması ilə kənd təsərrüfatı texnikumunun kadr hazırlama profili dəyişdirilərək kənd təsərrüfatı texnikumundan “Texniki kollec” adını alaraq texniki ixtisaslar üzrə də kadr hazırlamağa başlamışdır. Kollecin 2002-ci ildən “Naxçıvan Dövlət Texniki Kolleci” adını aldıqdan sonra qəbul planında dəyişiklik edilmişdir. 1995-ci ildə 2 ixtisas üzrə qəbul aparılmışdır. Elə həmin illərdən başlayaraq yeni ixtisaslar açılmağa başlanılmışdır. Bununla da kollecə maraq artmışdır. Kollecin 2002-ci ildə profilinin dəyişməsinə baxmayaraq muxtar respublika rəhbərinin kənd təsərrüfatının heyvandarlıq sahəsinə verdiyi önəm burada baytarlıq ixtisası üzrə kadr hazırlığı ilə özünü göstərmişdir. Hal-hazırda aparılan düzgün siyasət sayəsində baytarlıq ixtisası kollecin ən yaxşı ixtisaslarından birinə çevrilmişdir. Naxçıvan Dövlət Texniki Kollecində tədrisin keyfiyyətinin yüksəldilməsini daim diqqətdə saxlayan muxtar respublika rəhbərinin qayğısı ilə Kollec üçün ayrılmış yeni bina əsaslı şəkildə yenidənqurmadan sonra 10 oktyabr 2016-cı ildə tələbə və müəllimlərin istifadəsinə verilmişdir. Yeni istifadəyə verilən 5 mərtəbəli müasir tipli, 784 yerlik təhsil ocağında 15 elektron lövhəli sinif otağı, kimya-biologiya, fizika və baytarlıq laboratoriyaları, internetə qoşulmuş 62 kompüterlə təchiz olunmuş 3 kompüter otağı, 10 fənn kabinəsi, 120 yerlik iclas zalı fəaliyyət göstərir. Kadr hazırlığını yüksək şəkildə həyata keçirmək, tələbələrin öz ixtisaslarına mükəmməl şəkildə yiyələnmələrini təmin etmək və aldıqları nəzəri bilikləri təcrübə sahəsində həyata keçirmək üçün muxtar respublika rəhbərliyi tərəfindən hər cür şərait yaradılmışdır. 2010-cu ildən başlayaraq isə ixtisaslar üzrə təcrübələrin istehsalat müəssisələrində keçirilməsi işi həyata keçirilir. Naxçıvan Muxtar Respublikası Ali Məclisinin Sədrinin “Ali və orta ixtisas təhsili müəssisələrində ixtisasların müvafiq təşkilatlara hamilliyə verilməsi haqqında” 27 iyul 2015-ci il tarixli Sərəncamına uyğun olaraq Kollecdə tədris edilən ixtisaslar üzrə muxtar respublikada fəaliyyət göstərən müvafiq dövlət qurumları ilə ikitərəfli müqavilələr bağlanılaraq əməkdaşlıq edilir. Yuxarıda verilmiş fikirlər nəzərə alınmaqla qeyd etmək olar ki, Kollec daim diqqət mərkəzində olmuş və muxtar respublika rəhbərinin qayğısı ilə əhatə olunmuşdur. Bu illərdə kollecin tələbələri yaradılan yüksək şəraitdən və göstərilən qayğıdan istifadə edərək Naxçıvan Muxtar Respublikasında həyata keçirilən təhsil, ictimai-sosial və mədəni tədbirlərdə iştirak edərək böyük uğurlar qazanmışlar.